काठमाडौं । गायिका मेलिना राईले सन्जीव बराइलीसँग इन्गेजमेन्ट गरेकी छन् । मेलिनाले इन्गेजमेन्ट गरेका सञ्जीव म्युजिक एरेन्जर हुन् । उनका एरेन्जमेन्ट गरेका थुप्रै गीत लोकप्रिय छन् । केही समय अगाडि लोकप्रिय बनेको ‘फुलबुट्टे सारी’ उनैले एरेन्ज गरेको गीत हो ।
उनी गिटारिष्ट पनि हुन् । संगीतकार बसन्त सापकोटा सञ्जिव अहिलेका पहिलो रोजाइका गिटारिष्ट मध्येका एक भएको बताउँछन् । “सञ्जिव अहिलेको पहिलो रोजाइका गिटारिष्ट र कम्पोरमध्येका एक हुन्,” बसन्त भन्छन्, “उनका थुप्रै गीत लोकप्रिय छन् । अहिलेको व्यस्त गिटारिष्टमध्ये सञ्जीव एक हुन् ।”
सञ्जीव अहिलेका व्यस्त र रोजाइका संगीतकारको पहिलो च्वाइसका एरेन्जर र गिटारिष्ट भएको बसन्तको भनाइ छ । चलचित्र ‘नाईं नभन्नू ल–५’को ‘तिम्रो आँखामा आँखा जुधाई,’ बोलको गीतको एरेन्जर पनि उनी नै हुन् । यो गीतमा मेलिना राईको स्वर छ । मेलिनाका थुप्रै गीतमा सञ्जीवको एरेन्ज छ ।
हरि लम्सालको ‘हलि दाइ’मा सञ्जीवले गितार बजाएका छन् । यो गीतको भिडियोमा पनि उनलाई गितार बजाइरहेको देख्न सकिन्छ । झापा घर भएका सञ्जिव काठमाडौं बसेर लामो समयदेखि सांगीतिक क्षेत्रमा सक्रिय छन् । गायिका मेलिनाको घर मोरङ हो । उनी पनि लामो समयदेखि काठमाडौंमा बसेर सांगीतिक क्षेत्रमा क्रियाशिल छिन् ।